Sa punna de ocannu est de importu mannu: tocat de regòllere dinari po comporare unu cascu refrigerante chi non fatat pèrdere sos pilos a sas fèminas addaghi faghent sa chemioterapia.
Dae su 25 fintzas a ùrtima die de maju, ant fatu s’editzione de bator de su “Ziru de sas Oncologias in bitzicreta”, crèfidu dae su sòtziu Pink Flamingos. Est una cosa de importu mannu, chi aunit sas fèminas malàidas de cussa maladia mala a sas fèminas sanas chi las cherent azuare. In custu viazu, zirant sa Sardigna intrea po dare una nova de fortza, de torrare a nàschere e de istare totus paris.
Su ziru si tucat dae Casteddu e andat a totu sos ispidales de oncologia de s’ìsula intrea: a Aristanis, a s’Alighera, a Tàtari, a Terranoa, a Nùgoro e a Lanusè. Poi torrant a sa paule de Molentargius, ube bi sunt sos mengones in colore de rosa, chi sunt sinnale de elegàntzia, bellesa e de agguantu mannu. Donzi logu a ube andant, est s’ocasione de fàghere a connòschere menzus a sa zente custa maladia, ma puru de li fàghere a cumprèndere chi tocat a la prevènnere faghinde movimentu, ma puru mandigande bene e sanu. Sa punna est puru a fàghere a manera chi andent de acordu meda sos dutores e sas malàidas in sos ispidales, gai chi issas potant sanare pius in presse.
Ocannu su ziru depiat puru regòllere carchi acanteddu de dinari po comporare unu cascu refrigerante, bonu a fàghere a manera chi sas fèminas malàidas non nche perdant sos pilos dae conca.
Sas Pink Flamingos nos faghent a cumprèndere chi sa fadiga podet divènnere fortza e chi su viazu, mancari siat de turmentu e de tribulias, podet èssere fatu paris cun àteras fèminas, paris cun sos dutores, paris cun sos custrintos, a manera de èssere pius pagu de dolu.
