In Casteddu nch’ant agabbadu dae pag’ora s’editzione nùmeru 18 de su Prèmiu Gentlemen Sardos, fatu in tres dies, cun cursas e garas de veturas antigas. At bìnchidu Pàulu Pieroni, pilota de La Manovella del Fermano, chi at zutu cun abilitade manna sa vetura sua, Autobianchi A112 de su 1970. Pàulu at bìnchidu su primu prèmiu.
Un’iscalina pius in bassu bi sunt sos òmines de su Sòtziu Automoto d’Epoca Sardegna, chi at ammaniadu custu bell’atopu. Sunt Valentinu Poddi e Lisandru Virzì, chi ant impreadu una Volkswagen Maggiolino 1200 (de su 1954), e puru Alessio Bellisai e Riccardo De Martis, chi jughiant una Triumph TR3A (de su 1960). Cust’atopu nos mustrat comente, si unu at passione e si unu est de manos bonas, si podent fàghere cosas meravizosas po sa Sardigna intrea.
Sa gara fuit longhita. Si sunt tucados dae Casteddu, dae sa carrela de s’Europa, e ant sighidu po unos 430 chilòmetros. Nche sunt dados cara a Biddeputu, a Tortolì, a Ulassa, a Jersu e a Arrolli. In su Prèmiu Gentlemen Sardos nche sunt andados puru a logos bellos meda, comente sas percas de Su Màrmaru. B’at istadu poi mamentos de disvagu e de ispuntinos, addaghi nche sunt andados a sa Chentina de Jersu e a su museo etnogràficu Omu Axiu.
Lisandru Casciu, presidente de su sòtziu, at nadu chi cust’atopu est istadu unu de sos menzus e chi chie b’est andadu at pòtidu vìvere mamentos bellos de sa gara, ma puru mamentos de amigànsia e de allegria totu paris. At nadu puru chi sos viazos in cussos bellos logos de sa Sardigna los ant fatos cun rispetu mannu de su sartu ube nche sunt colados, sena imbrutare zassu perunu.
Cust’atopu nche l’ant agabbadu in s’ Aposentu Search de su Comune de Casteddu, ube ant sighidu a chistionare de sa cuntentesa e de s’armonia chi lis at dadu. Ant nadu chi no est solu una gara, ma unu contu fatu subra de bator rodas, ube su tempus nche colat paris cun sos sentidos pius bellos, abbaidande a logos de amenidade e de istòria antiga. Comente a donz’annu, su Prèmiu Gentlemen Sardos at fatu a bìere a totus chi a bìnchere cheret nàrrere a ischire lèzere e cumprèndere su caminu, non solu a bi cùrrere.
