– Su padel in Sardigna est un’isport chi si est isparghinde in totue, e b’at unu muntone de persones chi bi jogant chi est semper pius mannu. A cantu narat sa Federatzione Italiana de custu jogu (FIGP, est a nàrrere Federazione Italiana Gioco Padel), in cust’ùrtimu annu in s’ìsula nostra b’at istadu una crèschida de su 47% de sos tesserados, arribande a unos 3.850 jogadores uffitziales. Ma in sas provìntzias de Tàtari e de Casteddu b’at istadu una crèschida manna meda, est a nàrrere de su 60%. In totu s’ìsula b’at unos 120 campos pùblicos e privados po bi jogare. Custos logos sunt su bonu in sas tzitades mannitas, ma bi nd’at puru in sas àteras pius minores, comente s’Alighera, Terranoa e Aristanis, logos ube ant abertu una bindighina de campos noos solu in s’annu coladu.
S’aggradessu de su padel in Sardigna est duncas mannu, siat chi siant garas de professionistas, siat chi siant garas fatas solu po si divèrtere tra amigos. In su 2024 b’at istadu unos 80 torneos uffitziales. De custos tocat de s’ammentare de su “Sardinia Padel Master”, ube b’ant zogadu unos 200 jogadores. B’est puru su “Padel Fest Cagliari”, chi sunt andados a bìere in 1.500. Po jogare a padel, a Sardigna acudit zente meda puru dae foras, duncas puru su turismu isportivu est de importu mannu. Una de bator partes de sos turistas chi sunt bènnidos a Sardigna po sas fèrias at zogadu a padel puru. Custu cheret nàrrere chi ant ispesu unos 2 miliones de éuros po si nche marcare a sos torneos e po si annozare sos trastes chi lis servint a jogare o po si afitare sos campos ube pòdere jogare.
Sas iscolas de padel po sos pitzinnos e po sos piciocos sunt medas in custos ùrtimos tempos. Bi nd’at unu paghintzeddu in totue. In Casteddu b’est s’acadèmia “Padel Lab”, ube como b’at jogadores chi sunt a tres bortas tantu de cando aiant abertu, unos duos annos a oe. In Tàtari bi tenent su prozetu “Padel a Scuola”, chi l’at crèfidu su CONI e chi bi tenet unos 1.200 istudiantes chi faghent sos cursos po imparare a zogare. E in Sardigna, in su colare de sos annos, b’at nàschidu puru jogadores bonos abberu. In su 2024 Mateu Pinna e Zùlia Corda sunt istados connotos po àere bìnchidu garas meda, arribande a jogare in sas finales natzionales de sos pitzinnos a suta de sos 18 annos. Custu cumproat chi in Sardigna nch’amos zogadores bravos abberu.
B’at però carchi cosighedda chi diat a pòdere èssere mezorada. A cantu iscriet s’Osservatòriu Isportivu Sardu, nch’amos una bona parte, su 70%, de sos logos po jogare a padel chi sunt de privados. Po pòdere jogare si pagant unos 15 o 20 èuros po un’ora, duncas custu prètziu, chi est un’acanteddu caritu, non permitit a totus de apratigare cun su padel. Medas no lu ant custu dinare, e tandonon bi jogant. Sa pregunta dae parte de medas, duncas, est chi si fatant àteros campos po jogare chi siant pùblicos, ca solu su 10% de sas biddas sardas bi nde tenent. B’at chirca meda de logos adatos po pòdere jogare a padel. Mancari b’apat dinare de ispèndere, sa gana de jogare non si firmat in logu. Sa FIGP pensat, infatis, chi dae oe a un’annu, si si sighit de goi, in Sardigna amos a tènnere unos 6.000 tesserados de padel, duncas amos a divènnere una de sas regiones chi bi tenet su nùmeru pius artu de jogadores. Si custu at a èssere beru, su padel at a èssere unu de sos isport pius aggradèssidos de s’ìsula.
