Su patinazu cun sas rodas minoreddas postas una a costas de s’àtera, ma puru cussu a rodas una dainanti a s’àtera, paret torrande a nàschere in Sardigna. Nch’at una truma manna de zente chi lu pratigat e b’at atopos unu pagu in totue. Sa Federatzione Italiana Hockeye Patinazu (FIHP) at in Sardigna unos 1.200 tesserados: una parte faghent Hockey in sa pista, una parte patinazu asrìsticu e in lestresa. In Casteddu b’at patinadores meda, ca bi tenent un’hub, cun su PalaPattino de sa carrela de Istocolma, ube bi faghent sas garas e sos allenamentos. Ma bi jogant puru in Tàtari, in s’Alighera e in Terranoa. Donzi fine de chida, in su Poeto bi jogant in medas, siat zente chi bi est bona meda a zogare, siat zente imparadita. Puru a su Parcu de Monte Craru b’andat zente meda, ma po sos freestyler.
Po cantu pertocat s’agonismu, sa Sardigna est connota mescamente po su patinazu artìsticu. Su Club de Patinazu de Casteddu in su 2024 at bìnchidu tres medàllias in sos campionados italianos po jogadores a suta de sos 14 annos. In cussas garas, in sa categoria de sos pitzinnos pius minores de 14 annos, at bìnchidu puru Martina Piras. In s’hockey in pista, su Sòtziu Genàsticu de Casteddu est in serie A2: bi tenet unu muntone de zòvanos chi sunt bravos abberu e chi si distinghent in totue. Non mancant sos zogadores bravos in lestresa: su circùitu regionale “Sardinia Roller Cup” acortziat atletas dae totu s’Itàlia, cun atopos in Nùgoro, Aristanis e Carbònia.
Su turismu, betadu a pare cun s’isport, est cosa de importu po sa Sardigna. In Buggerru, in sa mina de Portu Flàvia, a dies de oe serrada, dae su 2023 bi faghent su “Roller Underground”. Custa cursa de patinazu est s’ùnica a intro de una mina, duncas nos batit turistas meda. Ma puru in Santu Diadoru bi faghent una cosa bella abberu: si narat Roller Park de sa marina. Sa zente curret cun sos pàtinos pròpriu cara a su mare. Sa FIHP Sardigna, ghiada dae su presidente Marcu Melone, at sa punna de fàghere un’atopu a livellu europeu de patinazu in su Gennargentu, in sa calidade de isport chi si narat downhill. Cussos logos amenos ant a èssere de ammàchiu po sos turistas chi nch’ant a bènnere.
Sas iscolas de patinazu in custos ùrtimos tempos bi tenent iscritos meda. In Sardigna b’amos 35 iscolas e prozetos meda po imparare a sos pitzinnos a patinare. Bi nd’at puru in sas iscolas mèdias de cursos, e si faeddat de unos 2.500 pitzinnos solu in cust’ùrtimu annu. Azumai su mesu de sos allievos ant pius pagu de 10 annos de edade. In Tàtari bi faghent un’atopu chi si narat “Sa note bianca de sas rodeddas”, a ube acudint unas 3.000 persones. B’at trumas de patinadores poi chi faghent caminos cara a sa marina chi arribant puru a 50 km.
Mancari si fatat passos a dainanti, b’at dudas meda ancora. B’at campos de jogu, infatis, chi cherent mezorados, mescamente su velòdromo de Selàrgius, chi est s’ùnica pista chi at sa cabertura in totu sa Sardigna e chi est istada fraigada in su 1998. Sos sòtzios, poi, cherent azudos po si mòvere dae unu logu a s’àteru po sas garas, ca sas pius bortas nche depent andare a Continente. Mancari nche siant custas pecas, in sas butegas sunt bendinde pàtinos meda: si narat chi siant 15.000 sos pàtinos chi ant bèndidu in su 2024, duncas su 25% in pius de s’annu innanti. Su còmporu e sa chirca de pàtinos est meda, mescamente in s’istiu, addaghi a inoghe acudint sos turistas. Duncas, po comente sunt andande sas cosas, sa Sardigna at a pòdere èssere sa capitale se su patinazu in Europa e a inoghe at a acudire semper pius sa zente po jogare cun sos pàtinos.
