Dantza isportiva in Sardigna: Elegàntzia, Passione e Talentos de iscobèrrere – Sa dantza isportiva in Sardigna est como in bona muta abberu, ca at atletas chi si distinghent a livellu natzionale e inter-natzionale, ma ca b’at zente meda chi nd’est amantiosa. B’at puru garas meda unu pagu in totue. Su CONI nche l’at posta in sos isport suos, e pure sa Federatzione Italiana Dantza Isportiva (FIDS) li dat importu mannu. A intro de sa truma manna de sas dantzas isportivas, bi sun puru sas dantzas istandard (valzer, tango, foxtrot), ma puru cussas latinas-americanas (samba, cha cha cha, rumba).
Sa Sardigna tenet balladores bravos, comente a Alèssio Mura e a Zùlia Orrù, chi sunt casteddajos e ballant paris. In su 2024 ant bìnchidu in sa categoria italiana de balladores de latinu-americanu pius minores de 21 annos. Issos duos ant a ballare, a nùmene de s’Itàlia, in sos campionados europeos chi b’ant a èssere dae oe a pagu tempus. In sas dantzas istandard tocat de montovare a Mateu Pireddu e a Sara Melis de Tàtari, chi como sunt in sos primos deghe po su ranking natzionale juniores. De montovare est puru Antoni Marras, chi po bator bortas est istadu campione italianu master in sa categoria de cussos pius mannos de 35 annos. Issu est mastru in s’academia sua chi at abertu in s’Alighera e a ube andant a imparare a ballare totu sos pitzinnos de sa zona de sa Nurra.
Po cantu pertocat sas garas, sa Sardigna nd’at donz’annu medas. De custas, tocat de montovare su “Trofeo Costa Smeralda” In Porto Cervo (tappa de su circùitu natzionale FIDS) e su “Sardinia Dance Cup” de PalaPirastu in Casteddu, a ube in su 2024 b’at andadu pius de 300 persones po cuncùrrere. Dae su 2023 in Nùgoro bi faghent s’ “Isola Dance Grand Prix”, gara WDSF (World Dance Sport Federation) chi nos at batidu atletas dae unas bìndighi natziones.
Sas iscolas chi imparant custas cosas in custos ùrtimos tempos sunt meditas. Si nde contat unas 32 afiliadas a sa FIDS in totu sa Sardigna, duncas b’at istadu una crèschida de su 20% in custos ùrtimos tres annos. B’at poi prozetos, comente “Danzando a Scuola”, chi ant apassionadu unos 1.800 piciocos. B’at de nàrrere puru chi su CUS de Casteddu nch’at postu sa dantza isportiva a intro de sas atividades universitàrias suas, e b’at unos 150 istudiantes chi si nche sunt marcados. Una cosa de mezorare est a pòdere àere logos adatos, ca a oe in Sardigna s’agatat solu bator logos chi rispetant cussu chi narat WDSF. In s’istajone de ocannu b’at istadu dòighi pàja de persones chi si sunt cualificadas in sas garas natzionales de sos zòvanos …e paret chi ant a sighire a èssere puru de pius! Sa Sardigna at zòvanos bravos meda a ballare, elegantes e dìligos cando isterrent passos de ballu. Custos piciocos sunt puru detzisos a arribare a ube disizant, duncas sa dantza isportiva at in s’ìsula nostra unu bellu logu po pòdere crèschere ancora meda.
